Daily Current Affairs: ಜೂನ್ 17,18 ರ 2026ರ ಪ್ರಮುಖ ಪ್ರಚಲಿತ ವಿದ್ಯಮಾನಗಳು!

ಪ್ರತಿದಿನದ ಪ್ರಚಲಿತ ಘಟನೆಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

1. ಅಂತರರಾಷ್ಟ್ರೀಯ ಶೃಂಗಸಭೆಗಳು (International Summits)

A) ರಷ್ಯಾದಲ್ಲಿ ‘ರಷ್ಯಾ-ಆಸಿಯಾನ್ ಶೃಂಗಸಭೆ’ (Russia-ASEAN Summit 2026) ಆರಂಭ

ಪಾಶ್ಚಿಮಾತ್ಯ ದೇಶಗಳು ರಷ್ಯಾ ಮೇಲೆ ತೀವ್ರ ಆರ್ಥಿಕ ನಿರ್ಬಂಧಗಳನ್ನು ಹೇರುತ್ತಿರುವ ಹಿನ್ನೆಲೆಯಲ್ಲಿ, ಜಾಗತಿಕ ರಾಜತಾಂತ್ರಿಕತೆಯಲ್ಲಿ ಮಹತ್ವದ ಬೆಳವಣಿಗೆಯೊಂದು ನಡೆದಿದೆ. ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ನೇತೃತ್ವದಲ್ಲಿ ಮಧ್ಯ ರಷ್ಯಾದ ಐತಿಹಾಸಿಕ ನಗರವಾದ ಕಜಾನ್ (Kazan) ನಲ್ಲಿ ‘ರಷ್ಯಾ-ಆಸಿಯಾನ್ ಶೃಂಗಸಭೆ’ ಅಧಿಕೃತವಾಗಿ ಆರಂಭವಾಗಿದೆ.

ಹಿನ್ನೆಲೆ: ರಷ್ಯಾ ಮತ್ತು ಆಸಿಯಾನ್ (ASEAN – ಆಗ್ನೇಯ ಏಷ್ಯಾ ರಾಷ್ಟ್ರಗಳ ಒಕ್ಕೂಟ) ನಡುವಿನ 35 ವರ್ಷಗಳ ಸಹಭಾಗಿತ್ವದ ನೆನಪಿಗಾಗಿ ಈ ಉನ್ನತ ಮಟ್ಟದ ಶೃಂಗಸಭೆಯನ್ನು ಆಯೋಜಿಸಲಾಗಿದೆ.
ಸಹ-ಅಧ್ಯಕ್ಷತೆ: ಫಿಲಿಪೀನ್ಸ್ ಅಧ್ಯಕ್ಷ ಫರ್ಡಿನೆಂಡ್ ಮಾರ್ಕೋಸ್ ಜೂನಿಯರ್ ಹಾಗೂ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಜಂಟಿಯಾಗಿ ಈ ಸಭೆಯ ಸಹ-ಅಧ್ಯಕ್ಷತೆ ವಹಿಸಿದ್ದಾರೆ. ಥಾಯ್ಲೆಂಡ್, ವಿಯೆಟ್ನಾಂ, ಮಲೇಷ್ಯಾ ಸೇರಿದಂತೆ ಒಟ್ಟು 11 ದೇಶಗಳ ನಾಯಕರು ಭಾಗವಹಿಸಿದ್ದಾರೆ.
ಚರ್ಚೆಯ ವಿಷಯಗಳು: ಜಾಗತಿಕ ಭದ್ರತೆ, ಮುಕ್ತ ವ್ಯಾಪಾರ, ಹೂಡಿಕೆ, ಡಿಜಿಟಲ್ ರೂಪಾಂತರ ಮತ್ತು ಪ್ರಸ್ತುತ ಜಗತ್ತನ್ನು ಕಾಡುತ್ತಿರುವ ಇಂಧನ ಬಿಕ್ಕಟ್ಟಿನ (Energy Crisis) ಕುರಿತು ಸುದೀರ್ಘ ಚರ್ಚೆ ನಡೆಸಲಾಗುತ್ತಿದೆ.
ಪ್ರಮುಖ ಒಪ್ಪಂದಗಳು: ಈ ಶೃಂಗಸಭೆಯಲ್ಲಿ ಜಾಗತಿಕ ರಾಜತಾಂತ್ರಿಕತೆಗೆ ದಿಕ್ಸೂಚಿಯಾಗಲಿರುವ ‘ಕಜಾನ್ ಪ್ರಕಟಣೆ’ (Kazan Declaration) ಮತ್ತು ‘ರಷ್ಯಾ-ಆಸಿಯಾನ್ ಸಮಗ್ರ ಕ್ರಿಯಾ ಯೋಜನೆ’ಗೆ ನಾಯಕರು ಸಹಿ ಹಾಕಲಿದ್ದಾರೆ.

B) ಜಿ7 ಶೃಂಗಸಭೆ 2026: ಜಾಗತಿಕ ನಾಯಕರೊಂದಿಗೆ ಪ್ರಧಾನಿ ಮೋದಿ ದ್ವಿಪಕ್ಷೀಯ ಮಾತುಕತೆ

ಫ್ರಾನ್ಸ್‌ನ ಇವಿಯನ್ (Evian) ನಗರದಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಜಿ7 (G7) ಶೃಂಗಸಭೆಯ ಸಂದರ್ಭದಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು ಜಾಗತಿಕ ನಾಯಕರೊಂದಿಗೆ ಮಹತ್ವದ ದ್ವಿಪಕ್ಷೀಯ ಮಾತುಕತೆಗಳನ್ನು ನಡೆಸಿದ್ದಾರೆ.

ಪ್ರಮುಖ ದ್ವಿಪಕ್ಷೀಯ ಸಭೆಗಳ ಮುಖ್ಯಾಂಶಗಳು:

ದೇಶ	ಪ್ರಮುಖ ನಾಯಕರು	ಚರ್ಚಿಸಿದ ಪ್ರಮುಖ ವಿಷಯಗಳು
ಯುನೈಟೆಡ್ ಕಿಂಗ್‌ಡಮ್ (UK)	ಕೈರ್ ಸ್ಟಾರ್ಮರ್ (ಬ್ರಿಟನ್ ಪ್ರಧಾನಿ)	ಮುಕ್ತ ವ್ಯಾಪಾರ ಒಪ್ಪಂದವನ್ನು (FTA) ಶೀಘ್ರದಲ್ಲೇ ಕಾರ್ಯಗತಗೊಳಿಸುವುದು ಹಾಗೂ ಹಾರ್ಮುಜ್ ಜಲಸಂಧಿಯಲ್ಲಿ ಮುಕ್ತ ಹಡಗು ಸಂಚಾರಕ್ಕೆ ಸಹಮತ.
ಕೆನಡಾ (Canada)	ಮಾರ್ಕ್ ಕಾರ್ನಿ (ಕೆನಡಾ ಪ್ರಧಾನಿ)	ವ್ಯಾಪಾರ, ಇಂಧನ, ನಾವೀನ್ಯತೆ (Innovation) ಮತ್ತು ಶಿಕ್ಷಣ. ಈ ವರ್ಷದ ಅಂತ್ಯದೊಳಗೆ ಪ್ರಧಾನಿ ಮೋದಿ ಕೆನಡಾಕ್ಕೆ ಭೇಟಿ ನೀಡುವ ಸಾಧ್ಯತೆ ಇದೆ.
ಯುನೈಟೆಡ್ ಅರಬ್ ಎಮಿರೇಟ್ಸ್ (UAE)	ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್	ಪಶ್ಚಿಮ ಏಷ್ಯಾ ರಕ್ಷಣೆ, ಭಾರತೀಯ ವಲಸಿಗರ ಸುರಕ್ಷತೆ ಹಾಗೂ ಭಾರತದ ಆಯಕಟ್ಟಿನ ತೈಲ ಸಂಗ್ರಹಾಗಾರಗಳ (Strategic Petroleum Reserves) ಅಭಿವೃದ್ಧಿ.

2. ಅಂತರರಾಷ್ಟ್ರೀಯ ಪ್ರಮುಖ ದಿನಾಚರಣೆಗಳು (Important Days)

A) ವಿಶ್ವಸಂಸ್ಥೆ ಚಾರ್ಟರ್ ದಿನ (UN Charter Day 2026)

ಜೂನ್ 26ರಂದು ಜಾಗತಿಕವಾಗಿ ಆಚರಿಸಲಾಗುವ ವಿಶ್ವಸಂಸ್ಥೆಯ ಚಾರ್ಟರ್ ದಿನಾಚರಣೆಯ ಮುನ್ನ, ವಿಶ್ವಸಂಸ್ಥೆಯಲ್ಲಿನ ಭಾರತದ ಖಾಯಂ ಪ್ರತಿನಿಧಿಯಾದ ರಾಯಭಾರಿ ಪರ್ವತನೇನಿ ಹರೀಶ್ ಅವರು ವಿಶ್ವಸಂಸ್ಥೆಯ ಚಾರ್ಟರ್‌ನ ಪೀಠಿಕೆಗೆ ಸಾಂಕೇತಿಕವಾಗಿ ಸಹಿ ಹಾಕಿದ್ದಾರೆ. “ವಿಶ್ವಸಂಸ್ಥೆಯ ಚಾರ್ಟರ್ (ಸಂವಿಧಾನ) ಕೇವಲ ಒಂದು ದಾಖಲೆಯಲ್ಲ, ಅದು 140 ಕೋಟಿ ಭಾರತೀಯರ ದೊಡ್ಡ ಭರವಸೆಯಾಗಿದೆ” ಎಂದು ಅವರು ಹೇಳಿದ್ದಾರೆ.

ಸ್ಪರ್ಧಾತ್ಮಕ ಪರೀಕ್ಷೆಯ ವಿಶೇಷ ಮಾಹಿತಿ: 1945ರ ಜೂನ್ 25ರಂದು ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿ ನಡೆದ ಸಮ್ಮೇಳನದಲ್ಲಿ ಭಾರತದ ಪರವಾಗಿ ಸರ್ ಎ.ರಾಮಸ್ವಾಮಿ ಮೊದಲಿಯಾರ್ ಅವರು ಮೂಲ ಚಾರ್ಟರ್ ಆಫ್ ಯುನೈಟೆಡ್ ನೇಷನ್ಸ್‌ಗೆ ಸಹಿ ಮಾಡಿದ್ದರು. ಭಾರತ ಬ್ರಿಟಿಷರ ಆಡಳಿತದಲ್ಲಿದ್ದರೂ ಸಹ, ವಿಶ್ವಸಂಸ್ಥೆಯನ್ನು ಸ್ಥಾಪಿಸಿದ ಮೂಲ 50 ಸದಸ್ಯ ರಾಷ್ಟ್ರಗಳಲ್ಲಿ (Founding Members) ಒಂದಾಗಿತ್ತು ಎಂಬುದು ಹೆಮ್ಮೆಯ ವಿಷಯ.

B) ಜಾಗತಿಕ ಮರುಭೂಮೀಕರಣ ಮತ್ತು ಬರಗಾಲ ವಿರೋಧಿ ದಿನ 2026 (World Day to Combat Desertification and Drought)

ಪ್ರತಿವರ್ಷ ಜೂನ್ 17 ರಂದು ಭೂಕುಸಿತ, ಮಣ್ಣಿನ सವೆತ ಮತ್ತು ಬರಗಾಲದ ಭೀತಿಯ ಬಗ್ಗೆ ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ಈ ದಿನವನ್ನು ಆಚರಿಸಲಾಗುತ್ತದೆ.

2026ರ ಜಾಗತಿಕ ಘೋಷವಾಕ್ಯ (Global Theme): “ಮಾಳಭೂಮಿಗಳು: ಗುರುತಿಸಿ. ಗೌರವಿಸಿ. ಪುನಃಸ್ಥಾಪಿಸಿ.” (Rangelands: Recognize. Respect. Restore.).
ಆತಿಥೇಯ ದೇಶ: ಈ ಬಾರಿ ಜಾಗತಿಕ ಮಟ್ಟದ ಮುಖ್ಯ ಕಾರ್ಯಕ್ರಮವನ್ನು ಆಫ್ರಿಕಾದ ಕೀನ್ಯಾ (Kenya) ದೇಶದಲ್ಲಿ ಆಯೋಜಿಸಲಾಗಿತ್ತು.
ಭಾರತದಲ್ಲಿ ಆಚರಣೆ: ಕೇಂದ್ರ ಗ್ರಾಮೀಣಾಭಿವೃದ್ಧಿ ಸಚಿವಾಲಯದ ಭೂಸಂಪನ್ಮೂಲ ಇಲಾಖೆಯು ಪ್ರಧಾನ ಮಂತ್ರಿ ಕೃಷಿ ಸಿಂಚಾಯಿ ಯೋಜನೆ 2.0 (WDC-PMKSY 2.0) ಅಡಿಯಲ್ಲಿ ದೇಶದ 813 ಜಲಾನಯನ ಪ್ರದೇಶಗಳಲ್ಲಿ ಈ ದಿನವನ್ನು ಆಚರಿಸಿತು. ಇದೇ ಸಂದರ್ಭದಲ್ಲಿ ‘ಏಕ್ ಪೇಡ್ ಮಾ ಕೆ ನಾಮ್’ (Ek Ped Maa Ke Naam) ಅಭಿಯಾನದಡಿ ದೇಶಾದ್ಯಂತ ಒಟ್ಟು 51,299 ಸಸಿಗಳನ್ನು ನೆಡಲಾಯಿತು.

ಇದನ್ನೂ ಓದಿ :– RDWSD Shivamogga Recruitment 2026: ಶಿವಮೊಗ್ಗ ಗ್ರಾಮೀಣ ಕುಡಿಯುವ ನೀರು ಇಲಾಖೆ ನೇಮಕಾತಿ; 31,000 ಸಂಬಳದ ಸರ್ಕಾರಿ ಹುದ್ದೆಗೆ ಇಂದೇ ಅರ್ಜಿ ಸಲ್ಲಿಸಿ

3. ರಾಷ್ಟ್ರೀಯ ಮತ್ತು ಆರ್ಥಿಕ ವಿದ್ಯಮಾನಗಳು (National & Economy)

A) ಭಾರತ-ಯುಕೆ ಮುಕ್ತ ವ್ಯಾಪಾರ ಒಪ್ಪಂದ (CETA) ಜುಲೈ 15 ರಿಂದ ಜಾರಿಗೆ

ಭಾರತ ಮತ್ತು ಯುನೈಟೆಡ್ ಕಿಂಗ್‌ಡಮ್ (UK) ನಡುವಿನ ಐತಿಹಾಸಿಕ ‘ಸಮಗ್ರ ಆರ್ಥಿಕ ಮತ್ತು ವ್ಯಾಪಾರ ಒಪ್ಪಂದ’ (Comprehensive Economic and Trade Agreement – CETA) ಅಧಿಕೃತವಾಗಿ ಜುಲೈ 15, 2026 ರಿಂದ ಜಾರಿಗೆ ಬರಲಿದೆ. ಬ್ರಿಟಿಷ್ ಇತಿಹಾಸದಲ್ಲಿಯೇ ಅತ್ಯಂತ ವೇಗವಾಗಿ ಜಾರಿಗೆ ಬರುತ್ತಿರುವ ಒಪ್ಪಂದ ಇದಾಗಿದೆ.

ವಿಶೇಷತೆ: ಇದು ಭಾರತದ ಇದುವರೆಗಿನ ಅತ್ಯಂತ ಸಮಗ್ರ ವ್ಯಾಪಾರ ಒಪ್ಪಂದವಾಗಿದ್ದು, ಯುಕೆ ಸುಂಕಗಳಲ್ಲಿ 99% ಮತ್ತು ಭಾರತೀಯ ಸುಂಕಗಳಲ್ಲಿ 90% ರಷ್ಟು ಉದಾರೀಕರಣವನ್ನು ಒಳಗೊಂಡಿದೆ.
ಆರ್ಥಿಕ ಲಾಭ: ಈ ಒಪ್ಪಂದದಿಂದ ದ್ವಿಪಕ್ಷೀಯ ವ್ಯಾಪಾರ ವಾರ್ಷಿಕವಾಗಿ £25.5 ಬಿಲಿಯನ್ (ಸುಮಾರು 2.7 lakh ಕೋಟಿ ರೂ.) ಹೆಚ್ಚಾಗುವ ನಿರೀಕ್ಷೆಯಿದೆ.
ಪ್ರಮುಖ ಸುಂಕ ಕಡಿತಗಳು: * ಸ್ಕಾಚ್ ವಿಸ್ಕಿ ಮೇಲಿನ ಸುಂಕ ಶೇ. 150 ರಿಂದ ಶೇ. 40ಕ್ಕೆ ಇಳಿಕೆ.
- ಆಟೋಮೊಬೈಲ್ ಸುಂಕ ಶೇ. 100 ರಿಂದ ಶೇ. 10ಕ್ಕೆ ಇಳಿಕೆ.
- ಇದರೊಂದಿಗೆ ಸಾಮಾಜಿಕ ಭದ್ರತಾ ಒಪ್ಪಂದ (Double Contribution Convention – DCC) ಕೂಡ ಜಾರಿಗೆ ಬರಲಿದ್ದು, ಯುಕೆಯಲ್ಲಿ ಕೆಲಸ ಮಾಡುವ ಭಾರತೀಯ ವೃತ್ತಿಪರರಿಗೆ ಸಹಕಾರಿಯಾಗಲಿದೆ.

B) ದೇಶದ ಎಲ್ಲಾ 28 ರಾಜ್ಯಗಳಲ್ಲಿ ವಿತ್ತೀಯ ಕೊರತೆ: ಸಿಎಜಿ (CAG) ವರದಿ ಬಹಿರಂಗ

ಭಾರತದ ಮಹಾಲೇಖಪಾಲರ (CAG) ‘ರಾಜ್ಯಗಳ ಹಣಕಾಸು ಸ್ಥಿತಿಗತಿ 2024-25’ ವರದಿಯನ್ನು ಭಾರತದ ಸಿಎಜಿ ಕೆ. ಸಂಜಯ್ ಮೂರ್ತಿ ಅವರು ಬಿಡುಗಡೆ ಮಾಡಿದ್ದಾರೆ. ಇದರ ಪ್ರಕಾರ ದೇಶದ ಎಲ್ಲಾ 28 ರಾಜ್ಯಗಳು ತೀವ್ರ ಆರ್ಥಿಕ ಒತ್ತಡದಲ್ಲಿದ್ದು, ಭಾರಿ ವಿತ್ತೀಯ ಕೊರತೆಯ (Fiscal Deficit) ಸುಳಿಗೆ ಸಿಲುಕಿವೆ.

ವರದಿಯ ಮುಖ್ಯಾಂಶಗಳು:
- 2025ರ ಮಾರ್ಚ್ 31ರ ವೇಳೆಗೆ ದೇಶದ ಎಲ್ಲಾ ರಾಜ್ಯಗಳ ಒಟ್ಟು ಸಾಲದ ಹೊರೆ ಬರೋಬ್ಬರಿ 90.51 ಲಕ್ಷ ಕೋಟಿ ರೂಪಾಯಿಗಳಿಗೆ ಏರಿಕೆಯಾಗಿದೆ.
- ರಾಜ್ಯಗಳ ಒಟ್ಟು ಬಜೆಟ್ ವೆಚ್ಚದಲ್ಲಿ ಸುಮಾರು ಶೇಕಡಾ 80ರಷ್ಟು ಪಾಲು ಕೇವಲ ದೈನಂದಿನ ಆಡಳಿತಾತ್ಮಕ ವೆಚ್ಚಗಳಿಗೆ (Revenue Expenditure) ಅಂದರೆ ಸಂಬಳ, ಪೆನ್ಷನ್ ಮತ್ತು ಹಳೆ ಸಾಲಗಳ ಬಡ್ಡಿ ಪಾವತಿಗೆ ಬಳಕೆಯಾಗುತ್ತಿದೆ.
- ವಿವಿಧ ಜನಪ್ರಿಯ ಯೋಜನೆಗಳ ಅನುದಾನ ಮತ್ತು ಸಬ್ಸಿಡಿಗಳಿಗೆ ಶೇ. 61ಕ್ಕಿಂತ ಅಧಿಕ ವೆಚ್ಚವಾಗುತ್ತಿದೆ ಎಂದು ವರದಿ ತಿಳಿಸಿದೆ.

4. ರಕ್ಷಣೆ ಮತ್ತು ತಂತ್ರಜ್ಞಾನ (Defence & Technology)

A)ಭಾರತ ಮತ್ತು ಥೈಲ್ಯಾಂಡ್ ನಡುವೆ 10ನೇ ರಕ್ಷಣಾ ಸಂವಾದ (10th Defence Dialogue)

ಜೂನ್ 16, 2026 ರಂದು ಥೈಲ್ಯಾಂಡ್‌ನ ಬ್ಯಾಂಕಾಕ್‌ನಲ್ಲಿ ಭಾರತ ಮತ್ತು ಥೈಲ್ಯಾಂಡ್ ನಡುವೆ 10ನೇ ರಕ್ಷಣಾ ಸಂವಾದ ಯಶಸ್ವಿಯಾಗಿ ಜರುಗಿತು. ಭಾರತದ ರಕ್ಷಣಾ ಸಚಿವಾಲಯದ ಜಂಟಿ ಕಾರ್ಯದರ್ಶಿ ಸತ್ಯಜಿತ್ ಮೋಹಾಂತಿ ಮತ್ತು ಥೈಲ್ಯಾಂಡ್‌ನ ಅಡ್ಮಿರಲ್ ನುಟ್ಟಾಪೋಲ್ ದೀಪ್ವಾನಿಚ್ ಸಭೆಯ ಸಹ-ಅಧ್ಯಕ್ಷತೆ ವಹಿಸಿದ್ದರು.

ಪ್ರಮುಖ ನಿರ್ಧಾರಗಳು: ಇಂಡೋ-ಪೆಸಿಫಿಕ್ ವಲಯದಲ್ಲಿ ಕಡಲ ಭದ್ರತೆ ಹೆಚ್ಚಿಸುವುದು, ‘ಮೇಕ್ ಇನ್ ಇಂಡ್ಲಾ’ ಅಡಿಯಲ್ಲಿ ರಕ್ಷಣಾ ಸಲಕರಣೆಗಳ ಜಂಟಿ ಉತ್ಪಾದನೆ ಮತ್ತು ಸೇನಾ ತರಬೇತಿ ವಿನಿಮಯವನ್ನು ಹೆಚ್ಚಿಸಲು ನಿರ್ಧರಿಸಲಾಯಿತು.
ನೆನಪಿರಲಿ: ಭಾರತ ಮತ್ತು ಥೈಲ್ಯಾಂಡ್ ದೇಶಗಳು 2025 ರಲ್ಲಿ ತಮ್ಮ ದ್ವಿಪಕ್ಷೀಯ ಬಾಂಧವ್ಯವನ್ನು ಅಧಿಕೃತವಾಗಿ ‘ವ್ಯೂಹಾತ್ಮಕ ಪಾಲುದಾರಿಕೆ’ (Strategic Partnership) ಮಟ್ಟಕ್ಕೆ ಏರಿಸಿದ್ದವು.

B)’ಸಿಂಹ 4×4′ (Simha 4×4) ಅತ್ಯಾಧುನಿಕ ಶಸ್ತ್ರಸಜ್ಜಿತ ವಾಹನ ಅನಾವರಣ

ಫ್ರಾನ್ಸ್‌ನ ಪ್ಯಾರಿಸ್‌ನಲ್ಲಿ ನಡೆದ ಪ್ರತಿಷ್ಠಿತ ‘ಯುರೋಸೇಟರಿ 2026’ (Eurosatory 2026) ರಕ್ಷಣಾ ಪ್ರದರ್ಶನದಲ್ಲಿ ಭಾರತದ ಭಾರತ್ ಫೋರ್ಜ್ ಕಂಪನಿಯ ಅಂಗಸಂಸ್ಥೆಯಾದ ಕಲ್ಯಾಣಿ ಸ್ಟ್ರಾಟೆಜಿಕ್ ಸಿಸ್ಟಮ್ಸ್ ಲಿಮಿಟೆಡ್ (KSSL), ಪ್ಯಾರಾಮೌಂಟ್ ಕಂಪನಿಯೊಂದಿಗೆ ಜಂಟಿಯಾಗಿ ಅಭಿವೃದ್ಧಿಪಡಿಸಿದ ‘ಸಿಂಹ 4×4’ ಯುದ್ಧ ವಾಹನವನ್ನು ಜಾಗತಿಕ ವೇದಿಕೆಯಲ್ಲಿ ಅನಾವರಣಗೊಳಿಸಿದೆ. ಇದು ನಗರ ಪ್ರದೇಶದ ಯುದ್ಧಗಳು ಮತ್ತು ಕಠಿಣ ಆಫ್-ರೋಡ್ ಕಾರ್ಯಾಚರಣೆಗಳಿಗೆ ಅತ್ಯಂತ ಸೂಕ್ತವಾದ ಶಸ್ತ್ರಸಜ್ಜಿತ ವಾಹನವಾಗಿದೆ.

5. ಕ್ರೀಡೆ ಮತ್ತು ಪ್ರಶಸ್ತಿಗಳು (Sports & Awards)

A)ಟೈಮ್ಸ್ ಪ್ರಭಾವಶಾಲಿ ಕ್ರೀಡಾಪಟುಗಳ ಪಟ್ಟಿಯಲ್ಲಿ ಸ್ಥಾನ ಪಡೆದ ಸ್ಮೃತಿ ಮಂಧಾನ!

ಪ್ರತಿಷ್ಠಿತ ‘ಟೈಮ್’ (TIME) ನಿಯತಕಾಲಿಕೆ ಬಿಡುಗಡೆ ಮಾಡಿರುವ ‘2026ರ ಜಗತ್ತಿನ 100 ಅತ್ಯಂತ ಪ್ರಭಾವಶಾಲಿ ಕ್ರೀಡಾಪಟುಗಳ’ ಪಟ್ಟಿಯಲ್ಲಿ ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಉಪನಾಯಕಿ ಸ್ಮೃತಿ ಮಂಧಾನ ಸ್ಥಾನ ಪಡೆದಿದ್ದಾರೆ. ಈ ಪಟ್ಟಿಯಲ್ಲಿ ಸ್ಥಾನ ಪಡೆದ ಏಕೈಕ ಭಾರತೀಯ ಕ್ರೀಡಾಪಟು ಇವರಾಗಿದ್ದಾರೆ.

ಮಂಧಾನ ಅವರ ಪ್ರಮುಖ ಸಾಧನೆಗಳು:
- ಅಂತರರಾಷ್ಟ್ರೀಯ ಮಹಿಳಾ ಕ್ರಿಕೆಟ್‌ನಲ್ಲಿ ಒಟ್ಟು 17 ಶತಕಗಳನ್ನು ಸಿಡಿಸಿದ್ದಾರೆ ಹಾಗೂ ಮೂರೂ ಮಾದರಿಯ ಕ್ರಿಕೆಟ್‌ನಲ್ಲಿ (Test, ODI, T20) ಶತಕ ಬಾರಿಸಿದ ಭಾರತದ ಮೊದಲ ಮಹಿಳಾ ಬ್ಯಾಟರ್.
- ಇವರ ನಾಯಕತ್ವದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವು 2024 ಮತ್ತು 2026ರ ಮಹಿಳಾ ಪ್ರೀಮಿಯರ್ ಲೀಗ್ (WPL) ಟ್ರೋಫಿಗಳನ್ನು ಮುಡಿಗೇರಿಸಿಕೊಂಡಿದೆ.
- ಇತ್ತೀಚೆಗೆ ಇವರಿಗೆ ಪ್ರತಿಷ್ಠಿತ ‘ಬಿಬಿಸಿ ಇಂಡಿಯನ್ ಸ್ಪೋರ್ಟ್ಸ್‌ವುಮನ್ ಆಫ್ ದಿ ಇಯರ್’ ಪ್ರಶಸ್ತಿ ಕೂಡ ಲಭಿಸಿತ್ತು.

ಇದನ್ನೂ ಓದಿ :- UPSC Recruitment 2026: ಸಿಬಿಐ, ಗಣಿ ಬ್ಯೂರೋ ಸೇರಿದಂತೆ 538 ಬೃಹತ್ ಗ್ರೂಪ್ ‘ಎ’ ಮತ್ತು ‘ಬಿ’ ಹುದ್ದೆಗಳಿಗೆ ಆನ್‌ಲೈನ್ ಅರ್ಜಿ ಆಹ್ವಾನ!

6. ನೇಮಕಾತಿ ಮತ್ತು ಸರಣಿ ಸುದ್ದಿಗಳು (Appointments & Short News)

A) ರಾಷ್ಟ್ರೀಯ ತನಿಖಾ ಸಂಸ್ಥೆ (NIA) ಹೊಸ ಐಜಿಯಾಗಿ ಸುಂದರರಾಜ್ ಪಟ್ಟಿಲಿಂಗಂ ನೇಮಕ

ಕೇಂದ್ರ ಗೃಹ ಸಚಿವಾಲಯವು ಹಿರಿಯ ಐಪಿಎಸ್ ಅಧಿಕಾರಿ ಸುಂದರರಾಜ್ ಪಟ್ಟಿಲಿಂಗಂ (Sundarraj Pattilingam) ಅವರನ್ನು ರಾಷ್ಟ್ರೀಯ ತನಿಖಾ ಸಂಸ್ಥೆಯ (NIA) ನೂತನ ಇನ್ಸ್ಪೆಕ್ಟರ್ ಜನರಲ್ (IG) ಆಗಿ ನೇಮಕ ಮಾಡಿದೆ. ಇವರು 2003ರ ಬ್ಯಾಚ್‌ನ ಛತ್ತೀಸ್‌ಗಢ ಕೆಡರ್‌ನ ಅಧಿಕಾರಿಯಾಗಿದ್ದು, ನಕ್ಸಲ್ ಪೀಡಿತ ಬಸ್ತಾರ್ ವಲಯದಲ್ಲಿ ಸುದೀರ್ಘ 12 ವರ್ಷಗಳ ಕಾಲ (7 ವರ್ಷ ಐಜಿಯಾಗಿ) ಸೇವೆ ಸಲ್ಲಿಸಿದ ಅನುಭವ ಹೊಂದಿದ್ದಾರೆ.

B) ಅಸ್ಸಾಂನ 4 ಸಾಂಪ್ರದಾಯಿಕ ಉತ್ಪನ್ನಗಳಿಗೆ ಪ್ರತಿಷ್ಠಿತ ಜಿಐ ಟ್ಯಾಗ್ (GI Tag) ಮಾನ್ಯತೆ

ಕೇಂದ್ರ ಸರ್ಕಾರದ ಭೌಗೋಳಿಕ ಸೂಚಕ ನೋಂದಣಾಧಿಕಾರಿಯು ಅಸ್ಸಾಂ ರಾಜ್ಯದ ನಾಲ್ಕು ಉತ್ಪನ್ನಗಳಿಗೆ ‘ಜಿಐ ಟ್ಯಾಗ್’ ನೀಡಿದ್ದಾರೆ:

ಬಾಹ್ ಶಿಲ್ಪ: ಅಸ್ಸಾಂನ ಸಾಂಪ್ರದಾಯಿಕ ಬಿದಿರಿನ ಕರಕುಶಲ ಕಲೆ.
ಬಿಹು ಪೇಪಾ: ಬಿಹು ನೃತ್ಯದಲ್ಲಿ ಬಳಸುವ, ಎಮ್ಮೆಯ ಕೊಂಬಿನಿಂದ ತಯಾರಿಸುವ ಸಾಂಪ್ರದಾಯಿಕ ರಣಕಹಳೆ/ಸಂಗೀತ ವಾದ್ಯ.
ಕರ್ಬಿ ಆಂಗ್ಲಾಂಗ್ ಹ್ಯಾಂಡ್ಲೂಮ್: ಕರ್ಬಿ ಆಂಗ್ಲಾಂಗ್ ಜಿಲ್ಲೆಯ ಬುಡಕಟ್ಟು ಸಮುದಾಯದ ಕೈಮಗ್ಗದ ಬಟ್ಟೆಗಳು.
ದೇವರಿ ಹ್ಯಾಂಡ್ಲೂಮ್ ಉತ್ಪನ್ನಗಳು: ದೇವರಿ ಬುಡಕಟ್ಟು ಸಮುದಾಯದ ಜ್ಯಾಮಿತೀಯ ವಿನ್ಯಾಸದ ಉಡುಪುಗಳು.

C) ಕೇಂದ್ರ ಆಯುಷ್ ಸಚಿವಾಲಯದಿಂದ ‘ಯೋಗ ಪಾರ್ಕ್ ಪೋರ್ಟಲ್’ (Yoga Park Portal) ಚಾಲನೆ

ದೇಶಾದ್ಯಂತ ಇರುವ ಸಾರ್ವಜನಿಕ ಉದ್ಯಾನವನಗಳನ್ನು ಯೋಗ ಮತ್ತು ಧ್ಯಾನದ ಕೇಂದ್ರಗಳನ್ನಾಗಿ (Community Wellness Hubs) ಪರಿವರ್ತಿಸಲು ಕೇಂದ್ರ ಆಯುಷ್ ಸಚಿವ ಪ್ರತಾಪ್‌ರಾವ್ ಜಾದವ್ ಅವರು ‘ಯೋಗ ಪಾರ್ಕ್ ಪೋರ್ಟಲ್’ ಅನ್ನು ಮಧ್ಯಪ್ರದೇಶದ ಖಜುರಾಹೋದಲ್ಲಿ ಪ್ರಾರಂಭಿಸಿದ್ದಾರೆ.

D) ಜಗತ್ತಿನ 5ನೇ ಅತ್ಯಂತ ಮೌಲ್ಯಯುತ ಸಂಸ್ಥೆಯಾಗಿ ಹೊರಹೊಮ್ಮಿದ ಸ್ಪೇಸ್‌ಎಕ್ಸ್ (SpaceX)

ಇಲಾನ್ ಮಸ್ಕ್ ಮಾಲೀಕತ್ವದ ಸ್ಪೇಸ್‌ಎಕ್ಸ್ (SpaceX) ಸಂಸ್ಥೆಯು ಇ-ಕಾಮರ್ಸ್ ದೈತ್ಯ ಅಮೆಜಾನ್ ಕಂಪನಿಯನ್ನು ಹಿಂದಿಕ್ಕಿ ಜಗತ್ತಿನ 5ನೇ ಅತ್ಯಂತ ಮೌಲ್ಯಯುತ ಕಂಪನಿಯಾಗಿದೆ. ಜೂನ್ 12, 2026 ರಂದು ಅಮೆರಿಕದ ನಾಸ್ಡಾಕ್ (Nasdaq) ಶೇರು ಮಾರುಕಟ್ಟೆಯಲ್ಲಿ ಸ್ಪೇಸ್‌ಎಕ್ಸ್ ತನ್ನ ಐಪಿಒ (IPO) ಮೂಲಕ ಪಟ್ಟಿ ಮಾಡಲ್ಪಟ್ಟಿತ್ತು. ಇದರ ಶೇರು ಮಾರುಕಟ್ಟೆಯ ಸಂಕೇತ SPCX ಆಗಿದೆ. ಇದರ ಮಾರುಕಟ್ಟೆ ಮೌಲ್ಯ ಬರೋಬ್ಬರಿ 2.66 ಟ್ರಿಲಿಯನ್ ಡಾಲರ್ ತಲುಪಿದೆ.

7. ಸುಪ್ರೀಂ ಕೋರ್ಟ್ ಮಹತ್ವದ ಆದೇಶ (Judiciary News)

A) ಆಧಾರ್ ಕಾರ್ಡ್ ಪೌರತ್ವದ ಪುರಾವೆಯೇ? ಸುಪ್ರೀಂ ಕೋರ್ಟ್ ನೋಟಿಸ್

ಹೊಸ ಮತದಾರರ ನೋಂದಣಿ ಅರ್ಜಿಯಲ್ಲಿ (Form-6) ಜನ್ಮ ದಿನಾಂಕ ಮತ್ತು ವಾಸಸ್ಥಳದ ಪುರಾವೆಯಾಗಿ ಆಧಾರ್ ಕಾರ್ಡ್ ಅನ್ನು ಕಡ್ಡಾಯವಾಗಿ ಬಳಸುವುದು ಕಾನೂನುಬಾಹಿರ ಎಂದು ವಕೀಲ ಅಶ್ವಿನಿ ಕುಮಾರ್ ಉಪಾಧ್ಯಾಯ ಸಲ್ಲಿಸಿದ್ದ ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯ (PIL) ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿ (CJI) ಸೂರ್ಯಕಾಂತ್ ಮತ್ತು ನ್ಯಾಯಮೂರ್ತಿ ವಿ. ಮೋಹನಾ ಅವರ ರಜಾಕಾಲದ ನ್ಯಾಯಪೀಠವು ಕೇಂದ್ರ, ರಾಜ್ಯ ಸರ್ಕಾರಗಳು ಮತ್ತು ಚುನಾವಣಾ ಆಯೋಗಕ್ಕೆ (ECI) ತುರ್ತು ನೋಟಿಸ್ ಜಾರಿ ಮಾಡಿದೆ.

ಪ್ರಮುಖ ಕಾನೂನು ಅಂಶಗಳು: ಆಧಾರ್ ಕಾಯ್ದೆ 2016ರ ಸೆಕ್ಷನ್ 9ರ ಪ್ರಕಾರ, ಆಧಾರ್ ಕಾರ್ಡ್ ಕೇವಲ ಗುರುತಿನ ಚೀಟಿಯಾಗಿದ್ದು, ಇದನ್ನು ಪೌರತ್ವ ಅಥವಾ ವಾಸಸ್ಥಳದ ನಿರ್ಣಾಯಕ ಪುರಾವೆಯಾಗಿ ಬಳಸುವಂತಿಲ್ಲ ಎಂದು UIDAI ಕೂಡ ಸ್ಪಷ್ಟಪಡಿಸಿದೆ.